சச்சின் - 200 Thanks for ALL

சச்சின் - 200  Thanks for ALL

சச்சின் அது 1996 அல்லது 97 இன்னு நினைக்குறேன்... சண்டே வேலை இல்லாம பக்கத்துல ஒரு ஆபீஸ் ல டிவி பக்க போனேன்.அவங்க டிவி ல கிரிக்கெட் பார்த்துட்டு இருந்தாங்க.வேல வழியே இல்லாம நானும் அத பார்த்தேன். அவங்க ரொம்ப ரசிச்சு பார்த்தாங்க.. நான் ஒன்னும் புரியாம பார்த்தேன்... அன்னிக்கு தன பிரஸ்ட் டைம் சச்சின் விளையாடுறத நான் பார்த்தது... அந்த மேட்ச் ல அவர் 8 /. 9 century  அடிச்சார்.அதுக்கு அப்புறம் நான் வளர வளர .. கிரிக்கெட் அப்டியே என்னோட ஊறி போய்டுச்சு..

நான் 10 வயசுல பார்த்தப்ப அப்படி ஆடுன சச்சின்... இனிக்கு நான் கிரிக்கெட் ஆடி  வீட்டுல இருக்கும் பூத்து கூட அவர் விளையாடுறத பார்க்கும் போது... வாவ் .. he  is really  master  of  cricket.

என்ன மாற்றி எந்தனையோ பேருக்கு கிரிக்கெட் மேல  ஆசை வர வச்ச சச்சின் தனது 200 டெஸ்ட் மேட்ச் முடிச்சு RETIREDஆகுறார் நு நினைக்கும் போது...
SACHIN ... We miss u badly.

அதுவும் அவர வற்புறுத்தி அப்படி செய்ய வைக்கும் போது.. அவர் உலக கோப்பை முடித்ததும்  RETIRED ஆகி இருக்கலாம்.ஆனா இப்பவும் எனக்கு சச்சின் கேக்குறது தான் உறுத்துது.

"I DONT KNOW WHAT TO DO OTHER THAN CRICKET -- After retirement " 
                                                                                                                  -  -  SACHIN.

10 வயசுல இருந்து கிரிக்கெட் கிரிக்கெட் இன்னு இருதவர் இப்படி ஆனா உண்மையாலுமே எனக்கே தெரில... அவர் என்ன பண்ணுவார்.. கிரிக்கெட் ல இருந்து  retired ஆகி?

Surely Cricket gonna miss SACHIN so much :Pஇனிக்கு கிரிக்கெட் சிறந்த பிசினஸ் ஆகிட இந்த காலத்துல சச்சின் இப்படி வற்புறுத்தி வெளிய அனுப்புறது எனக்கு பிடிக்கல.. பாக்கலாம் இனி இந்திய எப்படி ஆட போகுது.

நிறைய திறமையான வீரர்கள் இந்திய ல இருகாங்க... ஆனா அவங்கள எல்லாம் பண முதலைகள் விலைக்கு வாங்கி அவங்கள தான் அடியலா வசுகுவங்கலோனு வருத்தமா இருக்கு..

Any way Sachin ... thanks for your shots... thanks for your entertainment.. thanks for your cricket.... thanks for everything... 

MISSING U SO MUCH...

By your Fan...

S.Mohammed Arafath

Your comments are welcome .... share ur thoughts too ....

இந்திய அணியின் வாய்ப்பு: சாம்பியன்ஸ் டிராபி

இந்திய அணியின் வாய்ப்பு: சாம்பியன்ஸ் டிராபி

ஒரு  வழியாக IPL கிரிக்கெட் முடித்து இன்று இந்திய அணி சாம்பியன் கோப்பையில் ஆடுகிறது.அது பற்றி ஒரு அலசல்.

ஐபிஎல். சூதாட்ட விவகாரம், தோனியின் வணிக நலன்கள் குறித்த சர்ச்சை, ஸ்ரீனிவாசன் விவகாரம் என்று சர்ச்சைச் சுழலில் சிக்கித் தவிக்கும் இந்திய அணிக்கு சாம்பியன்ஸ் டிராபி ஒருநாள் கிரிக்கெட் சற்றே கூடுதல் அழுத்தத்தை ஏற்படுத்தியுள்ளது.

2011 உலகக் கோப்பையை வென்ற இந்திய அணி இல்லை இது. ஆனாலும் மினி உலகக் கோப்பை என்று அழைக்கப்படும் இந்தத் தொடரில் இந்தியா தன் புதுமுகங்களுடன் நிரூபிக்க வேண்டியுள்ளது. 2015ஆம் ஆண்டு உலகக் கோப்பை அணிக்கான பரிசோதனை அணியே இது. ரெய்னா, ரோகித் சர்மா, விஜய், தவான், கார்த்திக் ஆகியோருக்கு இந்திய அணியில் நிரந்தர இடம்பெற அருமையான வாய்ப்பு.

நாளை பலமான தென் ஆப்பிரிக்க அணியை இந்தியா எதிர்கொள்கிறது. பயிற்சி ஆட்டத்தில் இலங்கைக்கு எதிராக 330 ரன்களுக்கும் மேற்பட்ட இலக்கை கோலியும், தினேஷ் கார்த்திக்கும் ஒன்றுமில்லாமல் செய்தனர். அந்த போட்டியில் இந்திய பந்து வீச்சு மிகவும் பலவீனமகா இருந்தது.

ஆனால் நேற்று ஆஸ்ட்ரேலியாவுக்கு எதிரான பயிற்சி ஆட்டத்தில் உமேஷ் யாதவ் அதிவேகத்தில் வீச, இஷாந்தும் விக்கெட்டுகளைக் கைப்பற்ற இந்திய பந்து வீச்சு மீது புதிய நம்பிக்கை பிறந்துள்ளது.

இந்திய டாப் ஆர்டர் பேட்டிங்கில் அனுபவமின்மை சற்றே உள்ளது. ஷிகர் தவானை பொறுத்திருந்து பார்க்கவேண்டும். முரளி விஜய் எப்படி ஆடுவார் என்பதற்கான ஆதாரங்கள் இதுவரை இல்லை. ஆனால் தினேஷ் கார்த்திக், கோலி அபாரமாக ஆடி வருகின்றனர்.

மற்றபடி ரெய்னா தனது ஷாட் பிட்ச் பந்து குறித்த பயத்தை விட்டொழிக்கவேண்டும். நேற்றும் அவர் ஷாட் பிட்ச் பந்தை எதிர்பார்த்து சாதாரண நேர் பந்தில் பவுல்டு ஆனார். ரோகித் சர்மாவுக்கு எந்த பந்தை ஆடாமல் விடுவது என்பதில் சிக்கல் உள்ளது.

இந்த சாம்பையன்ஸ் டிராபியில் இந்தியா சவாலான தென் ஆப்பிரிக்கா, பாகிஸ்தான், வெஸ்ட் இண்டீஸ் அணிகளுடன் சேர்க்கப்பட்டுள்ளது. தென் ஆப்பிரிக்கா அன்று பாகிஸ்தானுக்கு எதிராக படு மோசமாக மண்ணைக் கவ்வியது.

 

பாகிஸ்தானின் பந்து வீச்சு புதிய பைர்மாணத்தில் அபாரமாக விளங்குகிறது.

இப்போதைய இங்கிலாந்து நிலைமைகள் ஸ்விங்கிற்கு பெருமளவு ஆதரவாக இருக்காது. ஏற்கனவே பிட்ச்கள் ரன்களை வழங்கும் பிட்சாக இருப்பதையே கண்டிருக்கிறோம். முதலில் பேட் செய்யும் அணி முதல் 20 ஓவர்களை ஜாக்கிரதையாக ஆட வேண்டியுள்ளது. துரத்தல் சுலபமாக உள்ளதை பயிற்சி ஆட்டங்களில் கண்டு வருகிறோம்.

எனவே டாஸ் ஒரு முக்கிய திருப்பமாக அமையும். சரியான அணிச் சேர்க்கைதான் தோனியின் கவலை. குறிப்பாக இர்பான் பத்தானை சேர்ப்பதா அல்லது ரவீந்திர ஜடேஜாவா என்பது பெரிய குழப்பம்தான்.

பந்து வீச்சில் எப்படியும் புவனேஷ், உமேக் யாதவ் இடம்பெற்றேயாகவேண்டும். இஷாந்தையும் ஒதுக்கி விட முடியாது. அஷ்வினுக்கு இங்கிலாந்து பிட்ச்களில் சுழல் வாய்ப்புகள் குறைவே. அவர் தனது பரிசோதனைப் பந்துகளை வீசி அது எடுபடாமல் போனால் அடி வாங்குவார்.

எனவே ஜடேஜாவை அஷ்வினுக்குப் பதிலாக அணியில் வைத்துக் கொண்டு இர்பானை அணியில் எடுப்பது நல்லது.

ஷிகார் தவான், ரோகித் சர்மா துவக்க, கோலி, கார்த்திக், ரெய்னா, தோனி, இர்பான் பத்தான், ரவீந்தர் ஜடேஜா, உமேஷ் யாதவ், புவனேஷ் குமார், அஷ்வின் அல்லது இஷாந்த் என்று அணிச் சேர்க்கை இருப்பது சிறந்தது.

சாம்பியன்ஸ் கோப்பையில் இந்தியா 2000ஆம் ஆண்டு கென்யாவில் இறுதிவரை வந்து நியூசீ.யிடம் தோல்வி தழுவியது. பிறகு இலங்கையில் 2002ஆம் ஆண்டு சாம்பியன்ஸ் டிராபியை இலங்கையுடன் பகிர்ந்து கொண்டது. அதன் பிறகு இந்தியாவின் சாம்பியன்ஸ் டிராபி ஆட்டங்கள் சொல்லிக் கொள்ளும்படி இல்லை.

சேவாக், கம்பீர், சச்சின், ஜாகீர் கான், யுவ்ராஜ் என்று எந்தத் தலைகளும் இல்லாத புதிய அணி இந்திய அணி. தோனியின் திறமையை நம்பி களமிறங்குகிறது.

டேல் ஸ்டெய்ன் நாளை ஆடுவது சந்தேகமாகியுள்ளது. இந்தியாவுக்கு இது ஒரு பெரிய ரிலீஃப்.

மற்ற அணிகளில் பாகிஸ்தான், நியூசீலாந்து பலமாக உள்ளது.

எப்படியும் அரையிறுதி வரை இந்தியா நுழைய வாய்ப்பிருப்பதாகவே படுகிறது.

கோப்பையை வெல்ல இந்திய அணியை ஆதரிப்போம். பெஸ்ட் ஆஃப் லக் இந்தியா! 

‌கி‌ரி‌க்கெ‌ட்: மூத்த வீரர்கள் என்ன செய்ய போகிறார்கள்.?

கி‌ரி‌க்கெ‌ட்: மூத்த வீரர்கள் என்ன செய்ய போகிறார்கள்.?

ஆஸ்ட்ரேலியாவுக்கு எதிராக, பேப்பரில் பலம் வாய்ந்த இந்திய அணி பாதாளத் தோல்வியைச் சந்தித்துள்ள நிலையில் மூத்த வீரர்களான சச்சின், டிராவிட், லஷ்மண் போன்றோர் தங்களது ஆட்டத்தின் மீது உண்மையான சந்தேகம் கொண்டு விலகிக் கொண்டு இளைஞர்களுக்கு வழிவிடுவதை பரிசீலிக்கவேண்டும்.இவர்களைக் கொண்டு 8 டெஸ்ட் போட்டிகளைத் தொடர்ச்சியாக அயல்நாட்டு மண்ணில் மண்ணைக் கவ்வியது இந்திய அணி. இவர்கள் இல்லாமல் இன்னும் ஓரிரு தொடர்களை இழக்கட்டும்! பரவாயில்லை. குறைந்தது இந்த அளவுக்கு தேறும் இளம் வீரர்கள் யார் என்பதையாவது நாம் பார்த்து விடலாம்.

சீரியசாக சில விஷயங்களை யோசிப்பதை விடுத்து வீரர்கள் தங்கள் பழம்பெருமைகளைப் பேசி வருவதும், நாங்களும் இங்கே 2- 0 என்று ஜெயித்தோம் என்று பிதற்றி வருவதும் முன்னேற்றத்திற்கு வழி வகை செய்யாது.இந்திய கிரிக்கெட் கட்டுப்பாட்டு வாரியமும் 'ஒன்றுமே நடந்து விடவில்லை" இதே வீரர்கள்தான் நம்மை பெருமைக்கு இட்டுச்சென்றனர் என்றெல்லாம் கொம்பு சீவி விடுவதும் உறுதியாக இந்திய டெஸ்ட் கிரிக்கெட்டை படுகுழியில் தள்ளும் முயற்சி.




சச்சின் 100, 100 என்று கனவு கண்டு இரண்டு மூன்று தொடர்களாக இந்திய அணியைச் சரியச் செய்துள்ளார். சேவாக் உடல் சமநிலை இல்லை. ஷாட் ஆடுவதற்கு முன்பும், பின்பும் அவரது பேலன்ஸ் சரியில்லை. ஹூக் , புல் ஷாட்களை ஆடாமல் நீண்ட நாட்களுக்கு ஓட்ட முடியாது, எனவே அவர் பின்னால் களமிறங்கவேண்டும், லஷ்மன் கிரீஸில் நின்ற படியே குப்பை கொட்டுகிறார். கம்பீரை அழைத்து ஒழுங்காக ஷாட் பிட்ச் பந்துகளை விளையாடும் வரை அணியில் இடமில்லை என்று கூறிவிடவேண்டும். தோனியை அழைத்து ஓய்வு பெற்ற மூத்த கேப்டன்கள் அவரது தவறுகளைச் சுட்டிக் காட்டவேண்டும். மேலும் கேப்டன் பேட்டிங் செய்வதும் அவசியம் என்பதையும் அவருக்கு அறிவுறுத்தவேண்டும்.




கோலி இரண்டு டெஸ்ட் போட்டிகளில் தோல்வி அடைந்தார். ஆனால் அடுத்த 2 டெஸ்ட் போட்டிகளில் இந்த தரத்திற்கு தான் தயார் என்பதை நிரூபித்துவிட்டார். அது போலத்தான் பிறரும், ஓரிரு டெஸ்ட் போட்டிகள் திணறல் இருக்கும் அதன் பிறகு அவர்கள் உருப்படியான வீரர்களாக மாறுவார்கள். அவர்களின் வழியை செங்கல் பெயர்ந்து விழுந்த குட்டிச் சுவர்களும், மகான் வீரர்களும் மறித்து வருவது நியாயமல்ல.

கிரிக்கெட் என்பது வெறும் பேட்டிங் மட்டுமல்ல. 40 வயது வரை ஒருவர் ரன் எடுக்கலாம் என்று வைத்துக் கொண்டாலும் ஃபீல்டிங் என்று ஒன்று இருந்து வருகிறதே! அதற்கு நியாயம் செய்யுமா வயது? லஷ்மண் அடிலெய்ட் டெஸ்ட் போட்டிகள் மட்டுமல்லாது தொடர் முழுதும் முக்கியத் தருணங்களில் கேட்ச்களைக் கோட்டை விட்டு இஷாந்த், அஷ்வின் வயிற்றெரிச்ச்லைப் பெற்றார். டிராவிடின் கேட்சிங் திறமையும் போய்விட்டது. சச்சின் பாதுகாப்பாக டீப் திசையில் பீல்ட் செய்து வருகிறார். எனவே இவர்கள் தீவிரமாக வேறு பாதையை பற்றி யோசிப்பது நல்லது.



முதலில் இந்தத் தொடரில் என்ன நடந்தது என்பதைப் பற்றிய ஒரு நேர்மையான விசாரணையும், அந்த விசாரணையின் முடிவை வெளிப்படையாக அறிவிப்பதும் நேர்மையாக அதற்கான திருத்தங்களைக் கொண்டு வருவதுமே தீர்வாக இருக்க முடியும்.இதனை விடுத்து அடுத்த 2 ஆண்டுகளுக்கு அயல்நாட்டுத் தொடர் இல்லை அப்போது பார்த்துக் கொள்ளலாம் என்று தள்ளிப்போடுவதும், அடுத்த வெற்றி பெற்றால் ரசிகர்கள் இந்தத் தோல்விகளை மறந்து விடுவார்கள் என்ற மனோநிலையையும் நிர்வாகமும் வீரர்களும் கொண்டிருந்தால் அது இந்திய டெஸ்ட் கிரிக்கெட்டிற்கு மூடுவிழாவாக அமையும் என்பதில் ஐயமில்லை.

உங்கள் கருத்துக்களை பகிரவும்... நன்றி.. :)

இந்தியாவில் இங்கிலாந்து : கிரிக்கெட் தொடர் ஒரு பார்வை

இந்தியாவில் இங்கிலாந்து : கிரிக்கெட் தொடர் ஒரு பார்வை

இங்கிலாந்து அணியிடம் இந்தியா அங்கு சென்றிருந்தபோது ஒரு போட்டியில் கூட வெற்றிபெற முடியாமல் மண்ணைக் கவ்வியது. இப்போது இந்தியா வந்திருந்த இங்கிலாந்து ஒரு நாள் போட்டிகளில் ஒரு போட்டியில் கூட வெல்ல முடியாமல் மண்ணைக் கவ்வியது. இது இரண்டு அணிகளுமே சொந்த மண்ணில் தான் வீரன் என்ன நிருபித்து உள்ளது.


இளம் வீரர்களான ரஹானே, கோலி, பந்து வீச்சில் ரெய்னா, ரவீந்திர ஜடேஜா, வருண் ஆரோன், உமேஷ் யாதவ், வினய் குமார் ஆகியோர் நல்ல ஆக்ரோஷமாக விளையாடினர்.ஆனால் பார்த்தீவ் படேல் ஆட்டம் சரி இல்லை.ராபின் உத்தப்பா விற்கு ஒரு வைப்பு கொடுத்து இருக்கலாம். தோனியின் பேட்டிங் இந்தத் தொடரில் அலாதியாக அமைந்தது. இங்கிலாந்துக்கு எதிராக அவர் தொடர்ச்சியாக 7 முறை நாட் அவுட்டாகத் திகழ்ந்துள்ளார்..

முன்பு கேப்டன்களில் பட்டௌடி, வடேகருக்குப் பிறகு வந்தவர்களில் பிஷன் பேடி சுனில் கவாஸ்கர், அஜாருதீன் ஆகியோரும் அயல்நாடுகளில் விளையாடுவது என்பது நாம் வெற்றி பெறுவதற்காக அல்ல என்ற மனநிலையையே கொண்டிருந்தனர். அவர்களை பொறுத்தவரை ஆட்டத்தை DRAW செய்யவே விரும்பினர்.கபில்தேவ் அந்த மனோநிலையை முதலில் முடிவுக்குக் கொண்டுவந்தார். மேற்கிந்திய அணியை முதலில் மேற்கிந்திய மண்ணில் ஒரு போட்டியில் அபாரமாக வெற்றி பெற்று பிறகு உலகக் கோப்பையில் இருமுறை வென்று கோப்பையை பெற்றுத்தந்தார்.

2000ஆம் ஆண்டு வரை இந்தியக் கேப்டன்களின் மன நிலை டெஸ்ட் போட்டிகளை DRAW செய்வதிலேயே இருந்தது. அதன் பிறகு கங்கூலி வந்தபிறகுதான் எல்லாம் ஆட்டக்களங்கள்தான், எதிலும் நாம் வெல்ல முடியும் என்ற ஒரு சிந்தனையை அணிக்குள் வளர்த்தார். அதன் பலன்தான் நமது டெஸ்ட் தரநிலை முதலிடமும், உலகக்கோப்பை இரண்டாவது சாம்பியன் பட்டமும்!

தோனியின் அயல்நாட்டு பயணங்கள் குறித்த பேச்சுக்கள் அஜாருதீன் போன்று எதிர்மறையாக இல்லாவிட்டாலும் தென் ஆப்பிரிக்கா தொடரில் காட்டிய வேகம் அவரிடம் இங்கிலாந்தில் இல்லை. அது மேற்கிந்திய தீவுகளுடனான போட்டியிலேயே தெரிந்தது.எழு விக்கெட் மீதம் உள்ள போதும் 15 ஓவர்களில் 96 ரன்கள் எடுத்தால் வெற்றி என்னும் போது DRAW செய்ததாக இரு அணிகளும் அறிவித்த போது மிக அதிர்ச்சியாக இருந்தது.உலகின் டெஸ்ட் தரநிலை முதலிடம் உள்ள ஒரு அணி இப்படி மேற்கிந்திய தீவுடன் பம்பி DRAW செய்த போதே நினைத்தேன் இது கண்டிப்பாக இங்கிலாந்து இடம் செருப்படிவங்கும் என்று.அதுபோலவே எந்த முறையும் இல்லாத அளவுக்கு செம அடி.தோணி தலைமையில் கிடைத்த மிகபெரும் தோல்வி இது.

தோல்விக்கு என்னதான் மூத்த வீரர்கள் காயம் என்றும் சொன்னாலும் காயங்கள் ஏற்படுவது சகஜம்தான், ஆனால் அதனை எதிர்கொள்ள முதலில் தயாராக இருக்கவேண்டும். தைரியமாக சில முடிவுகளை எடுக்கவேண்டும். சேவாக் இல்லையா உடனே அந்த இடத்தில் ராபின் உத்தப்பா அல்லது வேறு அதிரடி வீரரா என்ற முடிவை தோனி எடுத்திருக்கவேண்டும்.

ஏன் எடுக்க முடியவில்லை? காரணம் இங்கிலாந்து பிட்சில் நேர்முறையாக விளையாடும் மரபான பேட்ஸ்மென்களே பரிமளிப்பார்கள் என்ற ஒரு எதிர்மறை மனோநிலை.



தற்போது இங்கிலாந்தும் அதே மனோநிலையில்தான் இங்கு வந்தது. இந்தியாவை இந்திய மண்ணில் வீழ்த்துவது கடினம் என்ற காலங்காலமான மனோபாவத்துடன் வந்தால் வெற்றி எப்படி சாத்தியமாகும்?

மேலும் இந்திய வீரர்கள் உள்ளூரில் விளையாடும்போது வீரம் காட்டுவது அவர்களின் சமீபத்திய ஐ.பி.எல். ஒப்பந்தங்களுக்கும் தொடர்பை காட்டுகிறது.

ஏனெனில் ஐ.பி.எல். தொடரில் நன்றாக விளையாடி விட்டு தேசத்திற்கு ஆடும்போது நன்றாக விளையாடவில்லை என்றால் ரசிகர்கள் எங்கு தங்களை பணத்திற்காக ஆடுகிறார் என்று கூறிவிடுவாரோ என்ற அச்சமும் ஒரு புறம் இருக்கிறது.ஆனால் அயல்நாட்டில் விளையாடும்போது சரியாக விளையாடாவிட்டால் ரசிகர்களுக்கு வேறு காரணம் கூறிக் கொள்ளலாம் என்ற போக்கு உள்ளதாகவும் தெரிகிறது. அதாவ்து பிட்ச், ஸ்விங், என்று கூறி கொள்ளலாம்.

எனவே பணம் சம்பாதிப்பது அவசியம்தான், ஆனால் எந்த ஒரு நாட்டின் மக்களும் ஒரு மக்களாகத் தங்களை நினைத்து ஒருவிளையாட்டை ரசிப்பது தேசியவாத உணர்வினாலேயே.எனவே இளம் வீரர்கள் ஐ.பி.எல். கிரிக்கெட்டில் தனக்கு கிடைப்பது புகழ் என்ற மாயையிலிருந்து விடுபடவேண்டும். இருபது ஓவர் கிரிக்கெட்டினால்தான் இன்று வேகப்பந்து வீச்சு, சுழற்பந்து வீச்சு அழிந்து வருகிறது.



இந்தியா வெளியே சென்றால் உதை வாங்குவதும் உள்ளூரில் அனைவரையும் கூப்பிட்டு உதைப்பதும் ரசிகர்களிடையே ஒரு ஆயாசத்தை ஏற்படுத்துவதால்தான் இந்திய, இங்கிலாந்து ஒருநாள் தொடரில் மைதானத்தில் கூட்டம் அதிகம் இல்லை.

மும்பையில் 38,000 கொள்ளளவு கோண்ட வான்கடே ஸ்டேடியத்தில் 17,000 ரசிகர்களே வந்திருந்தனர். கொல்கத்தாவில் கூட்டம் பெருத்த ஏமாற்றம் அளிப்பதாக அமைந்தது.காரணம் இருபது ஓவர் கிரிக்கெட்டின் வருகை அல்ல! மாறாக ஒரு அணி எந்த வித போராட்டமும் இல்லாமல் சரணடைந்தால் ரசிகர்களுக்கு அறுவையாக மாறி விடுகிறது.

கிரிக்கெட் ஆட்டம் என்பது திரில் படம் போல் இருக்கவேண்டும் என்று எதிர்பார்க்கின்றனர். ஒற்றைத்தனமாக ஒரே அணிதான் வெற்றி பெறும் என்பது ரசிகர்களை ஆயாசப்படுத்தியுள்ளது.இந்தியாவில் இந்தியா விளையாடும்போது ஒருநாள் போட்டிகளுக்கு கூட்டம் குறைகிறது என்பது எச்சரிக்கை மணியாகும். சிந்திப்பார்களா நிர்வாகிகள்?

உங்க கருத்துக்களை பகிரவும்... நன்றி :)

படங்கள் : http://balapakkangal.blogspot.com

கிரிக்கெட் : இந்தியா படுதோல்வி ஏன்?

கிரிக்கெட் : இந்தியா படுதோல்வி ஏன்?

இங்கிலாந்தில் இந்திய கிரிக்கெட் அணி பெற்று வரும் படு மோசமான தோல்விகளுக்கு மூத்த வீரர்கள் முதல் ஊடகங்கள் தொடங்கி சாதாரண கிரிக்கெட் ரசிகர்கள் வரை காரணங்களைத் தேடுகின்றனர். இதில் பெரும்பாலோனோர் கருத்து அதிக கிரிக்கெட் போட்டிகளில் விளையாடுவதால் களைப்படைந்த அணியாக இது உள்ளது என்பதே.இந்த வாதத்தில் முற்றிலும் உண்மை இல்லை என்றாலும் இந்த வாதத்தை வேறொரு கோணத்தில் அணுகினால் இந்திய கிரிக்கெட் வாரியத்தின் பணவெறி, வீரர்களின், குறிப்பாக புகழ் பெற்ற வீரர்களின், விளம்பர ஒப்பந்தங்கள், இந்திய அணி ஒரு நாட்டில் விளையாடுகிறது என்றால் சுமார் 70- 80 நாடுகளின் நேரடி ஒளிபரப்பு உரிமை அதற்கான விளம்பர வருவாய் இன்ன பிற... இன்ன பிற... விடயங்கள் வெளிச்சத்திற்கு வரும்.

மேற்கிந்திய தொடரில் ஒருநாள் போட்டிகள் மற்றும் டெஸ்ட் போட்டிகளில் மூத்த வீரர்களுக்கு ஓய்வு, ஆனால் இங்கிலாந்தில் அதே களைப்படைந்த மூத்த வீரர்கள் அணியில் நுழைகின்றனர். அவர்கள் உண்மையில் உடற்தகுதியுடன் இருக்கிறார்களா என்பதை நிரூபிக்க உள்நாட்டு கிரிக்கெட்டில் அவர்கள் விளையாடுவதில்லை. நேரடியாகத் தேர்வு செய்யப்படுகின்றனர். இது இந்தியாவில் மட்டும்தான் நடக்கிறது.



இதற்குக் காரணம் என்ன? ஏன் இந்தியா அதிகப் போட்டிகளில் விளையாடுகிறது? ஏன் இந்திய அணியை அனைத்து கிரிக்கெட் வாரியங்களும் விரும்புகின்றன? இந்தக் கேள்விக்கான விடை நட்சத்திர பிராண்டுகளை விளம்பரப்படுத்தும் நட்சத்திர வீரர்களாக நம் வீரர்கள் இருப்பதே காரணம், எனவேதான் இந்திய அணி நம்பர் 1 அணியல்ல நம்பர் 1 பிராண்ட் என்று கூறுகிறோம். பி.சி.சி.ஐ. இந்த நம்பர் 1 பிராண்டை விற்பனை செய்யும் வர்த்தக நிறுவனம்.


மேற்கிந்திய தொடருக்குச் சென்றால் அது கவர்ச்சியற்ற அணி எனவே விளம்பர வருவாய் என்று பெரிதாக எதையும் பார்த்து விட முடியாது. அதனால் அதற்கு இளம் வீரர்கள் அல்லது அனுபவமற்ற வீரர்கள் கொண்ட அணியை அனுப்புவது. ஆனால் இங்கிலாந்து, ஆஸ்ட்ரேலியா, தென் ஆப்பிரிக்கா என்றால் அது பெரிய விளம்பர வருவாயைத் தருவது. இந்திய வாரியத்திற்கு மட்டுமல்ல, மேற்கூறிய அனைத்து வாரியங்களுக்கும்தான். எனவே, இதற்கு உடற்தகுதி இல்லாவிட்டாலும் நட்சத்திர பிராண்ட் வீரர்களை அனுப்புவது. அவர்களின் கிரிக்கெட் ஆட்டம் அப்போது எந்த நிலையில் உள்ளது என்பதை உறுதி செய்து கொள்ளாத வெறும் பிராண்ட் தேர்வு மட்டுமே நடைபெறுகிறது.

எந்த ஒரு வாரியமும் இந்தியாவுடன் தொடரை ஒப்பந்தம் செய்யும் போது 4 டெஸ்ட் போட்டிகள், 7 ஒருநாள் 2 இருபதுக்கு 20 போட்டிகள் என்று ஒப்பந்தம் செய்து கொள்கின்றன.



ஆஸ்ட்ரேலியாவில் கடைசியாக நடந்த முத்தரப்பு ஒருநாள் தொடரில் இந்தியா வென்றது. அத்துடன் முத்தரப்பு ஒருநாள் தொடரே வேண்டாம் என்று ஆஸ்ட்ரேலியா முடிவு கட்டியது, காரணம் ஆஸ்ட்ரேலியா அல்லாத அணிகள் விளையாடும்போது ஸ்பான்சரகள் வருவதில்லை, வருவாய் பாதிப்பு என்று காரணம் கூறியது.

ஆனால் தற்போது இந்தியா அங்கு பயணம் மேற்கொள்ளவிருக்கிறது. இதில் இந்தியா, இலங்கை, ஆஸ்ட்ரேலியா முத்தரப்பு தொடர் மீண்டும் விளையாடப்படுகிறது. ஏன் இலங்கையை அழைக்க வேண்டும், ஏன் நியூசீலாந்து இல்லை அல்லது மேற்கிந்திய தீவுகள் இல்லை, ஏன் பிற அணிகள் இல்லை என்று யாரும் கேட்டுவிடக்கூடாது. இந்தியா விளையாடினால் ஒளிபரப்பு உரிமைகள் மூலம் கிடைக்கும் கோடிக்கணக்கான டாலர்கள் தொகையை குறிவைத்து மீண்டும் முத்தரப்பு தொடரை ஆஸ்ட்ரேலியா நடத்துகிறது.

ஐ.சி.சி.யின் எதிர்கால கிரிக்கெட் பயணத் திட்டத்தில் இந்தியா, ஆஸ்ட்ரேலியா, இங்கிலாந்து, தென் ஆப்பிரிக்கா ஆகியவற்றின் ஆதிக்கம் அதிகம் உள்ளது. இதில் தலையாய ஆதிக்கம் இந்தியாவினுடையது என்ற குற்றச்சாற்றுக்கள் தற்போது பரவலாக எழுந்துள்ளன.

எனவே நம்பர் 1 பிராண்ட் ஆன இந்திய அணி அதிகம் கிரிக்கெட் ஆட்டங்களில் விளையாடுகிறது என்பது இந்த அணியின் கிரிக்கெட் ஆட்டத் திறன்களுக்காக அல்ல மாறாக பிராண்ட் இமேஜ்.

வருடம் முழுதும் எங்காவது விளையாடிக் கொண்டிருப்பது கிரிக்கெட் ஆட்டத்தில் மட்டும்தான் நடைபெறுகிறது. இந்த நிலையில் வீரர்கள் எளிதாக களைப்பைக் காரணமாகக் கூறுவது அபத்தம்தான். ஏனெனில் வீரர்களின் புகழ், அவர்கள் பிரதிநித்துவம் செய்யும் வணிகப்பொருட்கள், அந்த கார்ப்பரேட் நிறுவனங்களின் மறைமுக நிர்பந்தங்கள் ஆகியவையே இவர்கள் அதிக நேரம் சர்வதேச கிரிக்கெட்டில் மைதானங்களில் விளையாட வேண்டிய 'வணிக' கட்டாயத்தை ஏற்படுத்துகிறது. இதுதான் உண்மை. இதனால் களைப்பு, அதிக தொடர்கள் என்று தோனி கூறினால் அதில் அவரது பங்கும் இருக்கிறது என்றே பொருள்.



ஆனால் இவ்வளவு தூரம் களைப்பைப் பற்றி பேசும் நம் மூத்த வீரர்களாகட்டும், அவர்களது கருத்துக்களை எதிரொலிக்கும் ஊடகங்களாகட்டும் ஐ.பி.எல். கிரிக்கெட்டை குறை கூற முன்வருவதில்லை. இது ஒரு பெரிய மர்மம்தான். கவாஸ்கரும், சாஸ்த்ரியும் நடப்பு இங்கிலாந்து தொடரிலும் கூட பி.சி.சி.ஐ.யின் ஒலிபெருக்கி போல் ஐ.பி.எல். கிரிக்கெட்டின் புகழ்பாடி வருகின்றனர்!

பி.சி.சி.ஐ.யில் இருக்கும் வர்த்தக நிர்வாகிகளுக்கு புத்தி கூர்மை போதாது. என்னதான் இந்தியா சிமெண்ட்ஸ் ஸ்ரீனிவாசன் போன்றோர் இருந்தாலும் அவர்களால் ஒரு அம்பானி போலவோ, டாடா போலவோ, ஒரு மல்லையா போலவோ செயல் பட முடியாது. எனவே ஒரு சீரிய வர்த்த நிறுவனமாகவும் பி.சி.சி.ஐ. செயல்படவில்லை. கிரிக்கெட்டை நடத்தும் விளையாட்டின் காப்பாளர்களாகவும் செயல்படவில்லை. ஒன்று பிராண்டைக் காப்பற்றட்டும் அல்லது கிரிக்கெட்டைக் காப்பாற்றட்டும்.



பிராண்டா? கிரிக்கெட்டா? இதில் எதற்கு முக்கியத்துவம் தருவது என்பதை முடிவு செய்ய முதல்படியாக கிரிக்கெட் வாரியத்திலிருந்து தொழிலதிபர்களையும் அரசியல்வாதிகளையும் தூக்கி எறிந்து விட்டு கிரிக்கெட்டை அதன் அனைத்து அம்சங்களுடன் விளையாடிய, கிரிக்கெட் ஆட்டத்தை நேசிக்கும் முன்னாள் கிரிக்கெட் வீரர்களையே நியமிக்கவேண்டிய கட்டாயம் உள்ளது.

இங்கிலாந்தில் வாங்கிய தோல்வி போதாது என்று அடுத்ததாக ஆஸ்ட்ரேலியாவுக்கு நாங்கள் தயார் என்று தோனி உள்ளிட்டவர்கள் 'பாச்சா' காட்டுவது ஒரு பெரிய தமாஷ் என்பது ஒருபுறமிருக்க, இந்தத் தோல்விகளினால் பிராண்ட் இந்தியாவை மட்டமாக எடைபோட்டு விளம்பரதாரர்கள் பின்வாங்கவேண்டாம், என்று வர்த்தக நிறுவனங்களுக்கும் தொலைக்காட்சி நேரடி ஒளிபரப்பு உரிமையாளரகளுக்கும் தோனி உள்ளிட்டவர்கள் விடுக்கும் அறிவிப்பு இது என்பதையும் நாம் மறந்து விடவேண்டாம்.

உங்கள் கருத்துக்களை பகிரவும்... நன்றி.. :)

லார்ட்ஸ் மைதானத்தில் சதம் அடித்தார் சச்சின்:Sachin get century in Lords.

லார்ட்ஸ் மைதானத்தில் சதம் அடித்தார் சச்சின்:
Sachin get century in Lords.

இங்கிலாந்து லார்ட்ஸ் மைதானத்தில் இங்கிலாந்து உடனான முதல் டெஸ்டின் போது சதம் அடித்தார் சச்சின்.மேலும் விபரங்களுக்கு...













just for fun... :)
உங்கள் கருத்துக்களை பகிரவும்.

யார் இந்த டன்கன் பிளெட்சர்? : who is this Duncan Fletcher

யார் இந்த டன்கன் பிளெட்சர்? : who is this Duncan Fletcher

கேரி கர்ஸ்டன் இந்திய கிரிக்கெட் அணியின் பயிற்சியாளராக சாதித்து விலகிய பிறகு இந்திய கிரிக்கெட் கட்டுப்பாட்டு வாரியம் இங்கிலாந்து அணிக்கு 8 ஆண்டுகள் பயிற்சியாளராகப் பணியாற்றிய டன்கன் பிளெட்சர் என்ற முன்னாள் ஜிம்பாப்வே வீரரை பயிற்சியாளராக அறிவித்தது.

ஒப்பந்த காலம் முடிந்து விலகிய கேரி கர்ஸ்டன்தான் டன்கன் பிளெட்சரை பரிந்துரை செய்துள்ளார். கர்ஸ்டனின் பரிந்துரையின் பேரிலேயே பிளெட்சர் நியமிக்கப்பட்டுள்ளார். இதனை கிரிக்கெட் வர்ணனையாளர் ஹர்ஷா போக்ளே தெரிவித்துள்ளார்.

katanth kaalaththil pilechtar:



1999ஆம் ஆண்டு இங்கிலாந்து அணியின் பயிற்சியாளராக பிளெட்சர் பொறுப்பேற்றபோது இங்கிலாந்து அணி மிகவும் மோசமான நிலையில் இருந்தது. ஒருநாள், டெஸ்ட் கிரிக்கெட் என்று அனைத்திலும் தோல்வி மயம்.

அப்போதுதான் நாசர் ஹுசைன், மைக்கேல் வான் ஆகியோரது தலைமையில் புதிய தன்னம்பிக்கையை இங்கிலாந்து அணி பிளெட்சரின் பயிற்சியில் பெறுகிறது. இவரது பயிற்சிக் காலத்தில்தான் இங்கிலாந்து அணி பாகிஸ்தான், இலங்கையில் டெஸ்ட் தொடர்களை வென்றது. துணைக்கண்டத்தில் இங்கிலாந்து நிகழ்த்திய அதிகபட்ச இந்த சாதனை பிளெட்சர் காலத்தில்தான் நடந்தது. அதன் பிறகு இங்கிலாந்து 20 ஆண்டுகளுக்கு பிறகு 2005ஆம் ஆண்டு ஆஷஸ் தொடரை வெல்வதில் பிளெச்டரின் பங்கு பற்றி நாசர் ஹுசைனும், கேப்டன் மைக்கேல் வானும் மிகச் சிறப்பாகவே புகழ்ந்து பேசியுள்ளனர்.

இதனாலெல்லாம் இந்திய கிரிக்கெட் அணிக்கு இவர் சிறந்த பயிற்சியாளராக மிளிர்வார் என்று முன் கூட்டியே நாம் அறுதியிடவில்லை. கேரி கர்ஸ்டனும் முன் அனுபவம் இல்லாமல்தான் வந்தார். முன்னதாக ஜான் ரைட்டும் அனுபவம் இல்லாமல்தான் வந்தார். ஏன் கிரெக் சாப்பலுக்கே ஒரு சர்வதேச கிரிக்கெட் அணியின் பயிற்சியாளராக இருந்த அனுபவம் அதுவரை இருந்ததில்லை என்பதே நாம் கவனிக்கத்தக்கது.

கேரி கர்ஸ்டன் போன்றே, டன்கன் பிளெட்சரும், "நான் உங்களுக்கு எப்படி உதவட்டும்? என்ற அணுகுமுறையை உடையவர் என்று கூறப்படுகிறது.. மாறாக கிரெக் சாப்பலின் 'நீ இப்படித்தான் செய்தாகவேண்டும்' என்ற அணுகுமுறையே இந்திய அணியை வீழ்ச்சிக்கு இட்டுச் சென்றுள்ளது.

எனவே நாம் பொறுத்திருந்து பார்ப்போம்.

உலககோப்பை : இந்தியா பலம் - பலவீனம் .

இந்தியா - இங்கிலாந்து

நாளை பெங்களூருவில் நடைபெறவுள்ள உலகக் கோப்பை கிரிக்கெட் பி-பிரிவு ஆட்டத்தில் பலமான இந்திய அணி தன் பலத்தை நிரூபிக்க ஒரு வாய்ப்பாக இங்கிலாந்து அணியை எதிர்கொள்கிறது. இங்கிலாந்து அணிக்கும் ஹாலந்துக்கு எதிரான ஆட்டத்திற்குப் பிறகு கடும் நெருக்கடியும் அழுத்தங்களும் ஏற்பட்டுள்ளது.

இங்கிலாந்து அணியை உலகக் கோப்பை கிரிக்கெட் போட்டிகளில் இந்தியா 3 முறை வென்று 3 முறை தோற்றுள்ளது. எனவே இரு அணிகளுக்கும் அந்த விதத்தில் பிரச்சனை இல்லை.இங்கிலாந்து அணி நெதர்லாந்த் எதிரான ஆட்டத்தில் பந்து வீச்சில் பிராட், ஆண்டர்சன் அன்று 20 ஓவர்களில் 137 ரன்களை விட்டுக் கொடுத்தனர். அது போன்று நாளை வீசினால் இந்தியா மீண்டும் மிகப்பெரிய ஸ்கோரை எட்டும்.



இந்திய அணியைப்பொறுத்தவரை இப்போது பிரச்சனை அணிச்சேர்க்கை மற்றும் பௌலிங் தான் .இந்திய அணி கபில்தேவுக்குப் பிறகு பெரிய அளவில் திறமையான வேகப்பந்து வீச்சாளர்களை உருவாக்கவில்லை. இந்திய அணியின் வேகப்பந்து வீச்சு, குறிப்பாக ஒருநாள் கிரிக்கெட் போட்டிகளில் பலவீனமாகவே உள்ளது.

தற்போதைய அணியில் ஜாகீர் கான் மட்டுமே சீரான முறையில் வீசி நம்பிக்கை அளித்து வருகிறார். முனாஃப் படேலின் திசை மற்றும் அளவு சீராக இருந்ததற்குக் காரணம் அவர் அதிகம் வேகம் காட்டாமல் நேராக வீசுவதுதான். ஆனாலும் 370 ரன்கள் அல்லது 350 ரன்கள் அடிக்கும் போது அவர் பாதுகாப்பான வீச்சாளராக இருக்கலாம்.



நாளையே இந்தியா 250 ரன்கள்தான் எடுக்க முடிகிறது என்றபோது முனாஃப் படேல், ஆஷிஷ் நெஹ்ரா, ஸ்ரீசாந்த் கூட்டணி பயன்படாது என்பது தற்போது தெரிகிறது.

நெஹ்ரா சரியாக வீசவில்லை என்று கேப்டன் உணர்ந்தால் உடனடியாக அவரை விட வேகம் அதிகம் வீசி, சாதுரியத்தையும் பயன்படுத்தும் ஆர்.பி.சிங் போன்றவர்களை அழைத்திருக்கவேண்டும், அல்லது குறைந்தது இஷாந்த் ஷர்மாவையாவது தயார் படுத்தியிருக்கவேண்டும்.இது இந்திய அணி தேர்வாளர்கள் செய்த தவறு. குறைந்தது இர்பான் பதனை யாவது தயார் செய்திருக்க வேண்டும். தைரியமாக இன்னொரு பௌலாரை இணைக்கலாம்.



இப்போது ஸ்ரீசாந்தை அடுத்த போட்டியில் உட்கார வைத்துவிட்டு நெஹ்ராவை அணியில் எடுப்பது என்பது வலது கை ஸ்ரீசாந்திற்குப் பதில் இடது கை ஸ்ரீசாந்தை எடுப்பது போல்தான். எப்போது பிரவீண் குமார் விளையாட முடியவில்லை என்று தெரிந்ததோ அப்போதே மாற்று வீச்சாளர்களை அணியில் தேர்வு செய்யப்போவது பற்றி தெளிவான முடிவுகளை வைத்திருக்கவேண்டும்.

எனவே ஸ்ரீசாந்த் மேம்பாடு அடைகிறாரா என்பதை வலையில் உறுதி செய்தபிறகே அவரை அணியில் தேர்வு செய்ய வேண்டும், இல்லையெனில் பியூஷ் சாவ்லா, அல்லது அஷ்வினை அணியில் தேர்வு செய்வது பாதுகாப்பானது.இந்திய ஆட்டக்களங்களில் துவக்கத்திலேயே சுழற்பந்து வீச்சை ஒருமுனையில் வைத்துக் கொள்ளலாம். அது எதிரணியினரின் எதிர்பார்ப்பை நிலைகுலையச் செய்யும்.



ஜாகீர், முனாஃப் படேலுக்கு ஒரு ஆட்டம் மிகவும் சாதாரணமாக அமைந்து விட்டால் அது காலிறுதியாக இருக்குமானால் இந்திய அணிக்கு ஆபத்து உள்ளது.
இப்போது பிரச்சனையென்னவெனில் இந்திய பேட்டிங் தோல்வி அடையும்போது 4 பந்து வீச்சாளர்களை வைத்திருந்தால் அது தோல்வியில் கொண்டு போய் விடும் அபாயம் இருக்கிறது.

எனவே தோனிக்கு மிகப்பெரிய கஷ்டம் என்னவெனில் ஸ்ரீசாந்த், நெஹ்ரா கட்டாயம் ஃபார்முக்கு வர வேண்டிய நிர்பந்தம் ஏற்பட்டுள்ளது. இல்லையெனில் பேட்ஸ்மெனில் ஒருவரை தியாகம் செய்யவேண்டி வரும் அப்போது யூசுப் பத்தானின் இடம் பற்போகும், இதனால் இந்திய அணிக்கு பின் களத்தில் உள்ள ஒரு பெரிய அதிரடி வாய்ப்பு பற்போகும்.

ஒரு போட்டியில் மோசமாக வீசினார் ஸ்ரீசாந்த் என்பதற்காக அவரை அணியிலிருந்து நீக்கவேண்டிய அவசியமில்லை. நாளை இங்கிலாந்து அணியில் ஸ்ட்ராஸ், பீட்டர்சன் துவக்கத்தில் களமிறங்குவதால் இவரது ஆக்ரோஷம் பயன்தரலாம்.தோனிக்குப் தற்போது சாவ்லாவை அணியில் சேர்த்து 5 பந்து வீச்சாளருடன் இறங்குவதா அல்லது போன போட்டியில் வைத்திருந்த அதே அணியை இதிலும் களமிறக்கலாமா என்ற பிரச்சனை இருக்கிறது.



யுவ்ராஜ் சிங், யூசுப் பத்தான் வங்கதேச அணிக்கு எதிராக 370 ரன்கள் இருந்ததால் நன்றாக வீசியது போல் தெரிந்தது. ரன்கள் குறைவாக இருக்கும்போது உண்மையான ஒரு பந்து வீச்சாளரின் உதவியே தேவைப்படும். தோனி எப்படி யோசிக்கிறார் என்று தெரியவில்லை. ஸ்ரீசாந்தை நீக்கி விட்டு பியூஷ் சாவ்லாவை அணியில் எடுத்தால், துவக்கத்தில் ஜாகீருடன் ஹர்பஜன் சிங்கை பந்து வீச அழைத்து தோனி இங்கிலாந்துக்கு அதிர்ச்சியளிக்கலாம்.

பெங்களூர் ஆட்டக்களம் நிச்சயம் பேட்டிங்கிற்கு சாதகமான விளாசல் களமாகவே இருக்கும் என்று எதிர்பார்க்கலாம். பயிற்சி போட்டியில் எடுத்தது போல் ஸ்பின் எடுத்தால் இந்தியாவுக்குச் சாதகம். இங்கிலாந்து அணியில் ஸ்வான் மட்டுமே ஒரு அச்சுறுத்தும் பந்து வீச்சாளர்.



நெருக்கடியும், அழுத்தமும் இங்கிலாந்து பக்கம் உள்ளது, எனவே அதனை இந்தியா தங்களுக்குச் சாதகமாக பயன்படுத்திக் கொள்ளும் என்று எதிர்பார்க்கலாம். இந்தியா வெற்றி பெற்றால் அனைவருக்கும் மகிழ்ச்சி.

உலகக்கோப்பை 2011: மற்ற நாடுகள் (World Cup 2011- Other Teams.

உலகக்கோப்பை 2011:அயர்லாந்து



2007ஆம் ஆண்டு உலகக் கோப்பை கிரிக்கெட்டில் பாகிஸ்தானை வீழ்த்தி அதிர்ச்சியளித்த அயர்லாந்து அணி இந்த முறை கோப்பையை வெல்வோம் என்று கூறும் அளவுக்கு தன்னம்பிக்கையுடன் திகழ்வதாக ஜெஃப் மார்ஷ் தெரிவித்துள்ளார்.

டிரவர் ஜான்ஸ்டன், கெவின் ஓ'பிரையன், பாய்ட் ரான்கின் ஆகிய முன்னணி மித, ஸ்விங் ரக பந்துவீச்சாளர்களையும் ராபர்ட் வான் டெர்மெர்வ் என்ற ஓரளவுக்கு நல்ல சுழற்பந்து வீச்சாளரக்ளையும் இந்த அணி கொண்டுள்ளது. விக்கெட் கீப்பர் நியால் ஓ'பிரையன் அபாயகரமான பேட்ஸ்மென் என்பது குறிப்பிடத்தக்கது.

பேட்டிங்கில் இவர் தவிர, கேப்டன் போர்ட்டர்ஃபீல்ட், அல்கெஸ் கியூசக், எட் ஜாய்ஸ் (இவர் இங்கிலாந்து அணிக்கும் விளையாடியவர்), ஜார்ஜ் டாக்ரெல், ஆந்த்ரே போத்தா போன்ற ஆல்ரவுண்டர்களையும் இந்த அணி கொண்டுள்ளது.

2006ஆம் ஆண்டு முதல் 2010ஆம் ஆண்டு வரை 58 ஒருநாள் சர்வதேச போட்டிகளில் 28-இல் வென்று 24-இல் தோல்வி தழுவியுள்ளது. இதில் கனடா, நெதர்லாந்து, ஸ்காட்லாந்து கென்யா ஆகிய அணிகளுக்கு எதிராக அதிக வெற்றிகள் பெற்று ஆதிக்கம் செலுத்தியுள்ளது. தற்போதைய கேப்டன் போர்ட்டர்ஃபீல்ட் தலைமையில் 21 போட்டிகளில் 13-இல் வெற்றி பெற்றுள்ளது அயர்லாந்து.

உலகக்கோப்பை 2011:கனடா



கனடா அணி இதே நிலையில் உள்ள மற்ற அணிகளை விட பலவீனமாகவே உள்ளது என்பது அதன் இதுவரையிலான வெற்றி தோல்விகளை வைத்து நாம் கூறிவிடமுடியும். மொத்தம் 60 ஒரு நாள் சர்வதேச போட்டிகளில் இதுவரை 16-இல் மட்டுமே வென்று 43-ஐ தோற்றுள்ளது. அதனால் இந்த அணிபற்றி நாம் ஒரு குறைவான மதிப்பீடே வைத்திருந்தாலும்.ஒரு சில தனிநபர்கள் இந்த அணியில் வெற்றியை தனிப்பட்ட முறையில் தீர்மானிக்கக் கூடியவர்களே.

இந்த அணியில் தமிழ்நாட்டு அணிக்கு விளையாடிய பாலாஜி ராவ் என்ற லெக் ஸ்பின்னர் விளையாடுகிறார் என்பது குறிப்பிடத்தக்கது. நேற்று பயிற்சி ஆட்டத்தில் இவர் முன்னணி இங்கிலாந்து வீரர்களை தன் திறமையால் கட்டுப்படுத்தினார் என்பது குறிப்பிடத்தக்கது. இந்திய ஆட்டக்களங்கள் பற்றி நன்றாகவே அறிந்தவர். எனவே அபாயகரமான லெக்-ஸ்பின்னர் இவர். குர்ரம் சொஹான் என்ற மீடியம் வேகப்பந்து வீச்சாளரும் நம்பிக்கை அளிக்கும் விதமாக வீசி வருகிறார்.

பேட்டிங்கில் 2003ஆம் ஆண்டு சில பல வெடிகளைக் கொளுத்தி போட்ட ஜான் டேவிசன் இப்போதும் உள்ளார். ஆனால் வயது 40 ஆகிவிட்டது. இவர் ஒரு டைனமைட். 2003-இல் மேற்கிந்திய அணிக்கு எதிராக இவர் அடித்த அதிரடி சதமும், பாண்ட் உள்ளிட்ட பந்து வீச்சாளர்கள் இருந்த நியூஸீ அணிக்கு எதிராக அதிரடி 75ரன்களும் எடுத்து அச்சுறுத்தியதை யாரும் எளிதில் மறக்க முடியாது. உலகக் கோப்பை கிரிக்கெட்டில் இவர் அடித்துள்ள 307 ரன்களில் 35 பவுண்டரிகளும் 13 சிக்சர்களும் அடங்கும். 218 ரன்களை பவுண்டரிகளும் சிக்சர்களுமாகவே அடித்து நொறுக்கியுள்ளார்.

இவருக்கு அடுத்தபடியாக 32 வயதான ரிஸ்வான் சீமா உள்ளார். இவர் யூசுப் பத்தான், ரசாக், அஃப்ரீடி ரக வன்கொடுமை ஹிட்டர். துவக்கத்தில் களமிறங்குவார் அல்லது 5 அல்லது 6ஆம் நிலையில் களமிறங்குவார். இவர் விக்கெட்டை வீழ்த்தி விடுவது நல்லது. ஏனெனில் நிற்க வைத்து கட்டுப்படுத்துவது கடினம். இவருக்கு சிக்சர் அடிக்கும் மிஷின் என்ற பெயரும் உண்டு.

இவர் எடுத்துள்ள 523 ஒரு தினப் போட்டி ரன்களில் 67 பவுண்டரிகளையும் 24 சிக்சர்களையும் அடித்துள்ளார் என்றால் நாம் பார்த்துக் கொள்ளலாம். 412 ரன்களை அவர் பவுண்டரிகளிலும் சிக்சர்களிலுமே அடித்துள்ளார். இவர் தவிர குனசேகரா, கேப்டன் பாகாய் ஆகியோரும் நல்ல பேட்ஸ்மென்கள். ரிஸ்வான் சீமா வலது கை மிதவேகப்பந்தும் வீசக்கூடியவர். எனவே இவர் ஒரு அதிரடி ஆல்ரவுண்டர் எனலாம். இவர் நேற்று இங்கிலாந்துக்கு எதிரான பயிற்சிப் போட்டியில் 28/5 என்ற நிலையில் களமிறங்கி 71 பந்துகளில் 10 பவுண்டரிகள் 5 சிக்சர்களுடன் 93 ரன்கள் எடுத்து புகுந்து விளையாடி அச்சுறுத்தினார்.

எனவே கனடா அணியை நாம் எளிதில் எடைபோட முடியாது. அதுவும் பாகிஸ்தான் போன்ற அணிகளுக்கு கனடா எப்போதும் அபாயகரமான அணியே.

உலகக்கோப்பை 2011:கென்யா



பேட்டிங்கில் பலம் இருக்கும் அளவுக்கு இந்த அணியிடம் பந்துவீச்சு பலம் இல்லை. எனினும் 2003ஆம் ஆண்டு உலகக் கோப்பைப் போட்டியில் இலங்கை அணிக்கு கொடுத்த அதிர்ச்சியை எளிதில் மறந்து விடமுடியாது. 1996ஆம் ஆண்டு உலகக் கோப்பை போட்டியில் மேற்கிந்திய அணியை வீழ்த்தியதையும் மறக்க முடியாது. ஒருமுறை தெனாப்பிரிக்காவில் இந்தியாவையும் வீழ்த்திய அணி கென்யா. செரென் வாட்டர்ஸ் என்ற 20 வயது துவக்க வீரர் உத்தி ரீதியாக ஒரு சிறந்த வீரர். பயிற்சிப் போட்டியில் ஹாலந்துக்கு எதிராக சதம் எடுத்தார்.

ராகேப் படேல் என்ற பின்கள அதிரடி வீரரும் உள்ளார். டிகோலோவுக்கு 41 வயதாகி விட்டது. இருந்தாலும் இவரது பந்து வீச்சில் இன்னமும் விக்கெட்டுகள் சரிந்தே வருகின்றன. காலின்ஸ் ஒபூயா, தன்மய் மிஷ்ரா ஆகிய பேட்டிங் திறமைகளும் உள்ளன. பழைய ஆல் -ரவுண்டர் தாமஸ் ஒடோயோவும் உள்ளார். நல்ல திறமையான அணிதான், எதிரணியினர் கவனமின்றி 240 ரன்களே எடுக்கிறார்கள் என்றால் கென்யா நிச்ச்யம் அந்த இலக்கை எளிதில் துரத்தும் அது எந்த அணிக்கு எதிராக இருந்தாலும் சரி.

உலகக்கோப்பை ௨௦௧௧:ஹாலந்து



உலகக் கோப்பை கிரிக்கெட் தொடர்களில் 12 போட்டிகளில் 5-இல் வெற்றி பெற்றுள்ளது அவ்வளவு மோசமானதாக இல்லை. அதே போல் 57 ஒருநாள் சர்வதேசப் போட்டிகளில் 23-இல் வெற்றி பெற்றிருப்பதும் வளரும் அணிக்கன அறிகுறியைக் காண்பிப்பதாக உள்ளது. இந்த அணியிலும் சில தனிப்பட்ட வீரர்கள் சிறப்பு வாய்ந்தவர்கள். ரயான் டென் டஸ்சதே என்பவர் இதில் முக்கியமானவர் இவர் ஒரு ஆல்-ரவுண்டர். கனடா அணியை நெதர்லாந்து அணி 6 முறை சந்தித்து 6 முறையும் வெற்றி கண்டுள்ளது. டென் டஸ்சதே 27 ஒருநாள் போட்டிகளில் 1234 ரன்களை 3 சதம், 8 அரைசதங்களுடன் எடுத்துள்ளார். சராசரி 68.55. ஒரு நல்ல பந்து வீச்சாளரும் கூட.

துவக்கத்தில் களமிறங்கும் கெர்வீசீ, ஷ்வார்சின்ஸ்கி அபாயகரமான துவக்க வீரர்கள். பின்களத்தில் பர்மன், முதாசர் புகாரி ஆகியோரும் பேட்டிங்கில் கைகொடுப்பர். பயிற்சி ஆட்டத்தில் அன்று கென்யாவை வீழ்த்தியதிலிருந்து இந்த அணியின் சவால் தன்மை தெரியவந்தது.

இந்த 4 டெஸ்ட் விளையாடாத அணிகள் தவிர நிச்ச்யம் அதிர்ச்சியளிக்கக்கூடும் என்று பலரும் கருதும் அணி ஜிம்பாப்வே, வங்கதேசம்ஆகியவையாகும்.

பிரவு ஏ-யில் முன்னணி அணிகளில் நியூஸீலாந்தும், சில வேளைகளில்பாகிஸ்தானும் இந்த அணிகளிடம் தோற்க வாய்ப்பிருக்கிறது.

பிரிவு பி-யில் மேற்கிந்திய அணி இருக்கும் நிலையில் வங்கதேசம்,அயர்லாந்து அணிகள் அந்த அணிக்கு அபாயகரமானதே அயர்லாந்து அணிமேற்கிந்திய அணியையும், வஙகதேசத்தையும், -ஹாலந்தையும் வீழ்த்திவிடமுடிய்ம் எனில் சூப்பர் 8 சுற்றுக்குள் நுழையும் வாய்ப்பு உள்ளது. அதேபோல் வங்கதேசம் ஹாலந்து, அயர்லாந்து அணிகளை வீழ்த்தி மேற்கிந்தியஅணியை வீழ்த்தினால் காலிறுதிச்சுற்றுக்கு வாய்ப்புள்ளது.

பிரிவு ஏ-யில் ஜிம்பாப்வே அணி கன்டா, கென்யா அணிகளை வீழ்த்திபாகிஸ்தானையும் போராடி வீழ்த்தினால் காலிறுதி வாய்ப்பு உள்ளது.

மொத்தத்தில் வங்கதேசம், அயர்லாந்து, ஹாலந்து, ஜிம்பாப்வே, கனடா,கென்யா ஆகிய அணிகளில் எந்த அணி தங்கள் பிரிவில் உள்ள ஒரு முக்கியஅணிக்கு அதிர்ச்சியளித்தாலும் காலிறுதியில் நுழைய வாய்ப்பிருக்கிறது.

உண்மையில் பலவீனமான அணிகளாக நாம் கருதவேண்டியது நியூஸீலாந்தும்,மேற்கிந்தியத் தீவுகளும்தான் ஏனெனில் காலிறுதிக்குத் தகுதி பெறாமல்போகும் அணிகளின் பட்டியலில் இந்த அணிகள் உள்ளன.

அதனால் இந்த உலகக் கோப்பையை . முதன்மை 8 அணிகள்தான்வரவேண்டும் என்ற விதமாகத் தயாரித்திருப்பதாகக் ஐ.சி.சி. கூறியதற்குஉண்மையில் இந்த அணிகள்தான். தங்கள் ஆட்டம் மூலம் ஐ.சி.சி.யின்திட்டத்தில் கரியைப்பூசவேண்டும்.

Edit View உலகக்கோப்பை 2011: நியூசிலாந்து (World Cup 2011- Team NEWZEALAND)

2011 உலகக் கோப்பையில் நியூசிலாந்து.



இந்த உலகக் கோப்பையில் ஸ்டைரிஸ் உள்ளார் ஆனால் அவ்வளவாக ஃபார்மில் இல்லை. ஓரம் உள்ளார் காயமடைந்த நிலையில் களமிறங்குகிறார். வெட்டோரியின் தலைமையில் தாக்கம் இல்லாமல் போய்விட்டது. மெக்மில்லன் இல்லை, பாண்ட் இல்லை. ஒட்டுமொத்தமாக இது வரை 62 உலகக் கோப்பை போட்டிகளில் 35-இல் வென்று 26-இல் தோல்வி தழுவியுள்ளது நியூஸீலாந்து.

2010/11 ஆம் ஆண்டுகளில் நடைபெற்ற 27 ஒருநாள் போட்டிகளில் 8-இல் மட்டுமே வென்று 17 போட்டிகளில் தோல்வி தழுவியுள்ளது. இதில் கடைசியாக பாகிஸ்தானுடன் பெற்ற 2 வெற்றிகளும் அடங்கும். வங்கதேசத்தில் தொடரை முழுதும் இழந்தது, இந்தியாவுக்கு எதிராக தொடரை முழுதும் இழந்தது. இந்திய, வங்கதேசம், இலங்கையில் இந்த உலகக் கோப்பை போட்டிகள் நடப்பதை வைத்துப் பார்க்கும்போது இந்தத் தோல்விகள் நியூஸீலாந்து அணிக்கு இந்த உலகக் கோப்பையில் வாய்ப்புகள் ஏறக்குறைய இல்லை என்றே கூற வைக்கிறது.



ஆசியாவில் விளையாடிய 146 ஒரு நாள் போட்டிகளில் நியூசீலாந்து 43-இல் மட்டுமே வெற்றி பெற்று 96 போட்டிகளில் தோல்வி தழுவியுள்ளது. இந்தப்பகுதி ஆட்டக்களங்களில் இந்த அணி தர்ம அடி வாங்கியுள்ளதை இது எடுத்துரைக்கிறது.

டேனியல் வெட்டோரி தலைமையில் இதுவரை 76 போட்டிகளை விளையாடியுள்ள நியூசீலாந்து 37-இல் வென்று 31-இல் தோற்றுள்ளது.



இந்த முறை அந்த அணி இந்திய ஆட்டக்களங்களில் அதிரடி மன்னன் பிரெண்டன் மெக்கல்லம்மை துவக்கத்தில் களமிறக்கினால் ஏதாவது பிரேக் த்ரூ செய்ய வாய்ப்புள்ளது. ஏனெனில் ஐ.பி.எல். கிரிக்கெட்டில் ஆடிய இவரும், ராஸ் டெய்லரும் அணியின் இப்போதைய பலங்கள். வெட்டோரியின் சுழற்பந்து ஒரு பலம் அவ்வளவே.

உலகக்கோப்பை 2011: வெஸ்ட் இண்டீஸ் (World Cup 2011- Team Westindies)

2011 உலக கோப்பை : வெஸ்ட் இண்டீஸ்.



2000ஆம் ஆண்டு முதல் 2011 தற்போது வரை மேற்கிந்திய அணி 252 போட்டிகளில் 100 போட்டிகளில் மட்டுமே வெற்றி பெற்று 135போட்டிகளில் தோல்வி தழுவியுள்ளது. 2010/11 ஆம் ஆண்டில் 20 போட்டிகளில் 6-இல் மட்டுமே வெற்றி பெற்றுள்ளது 12 தோல்விகளைச் சந்தித்துள்ளது.

எனவே புள்ளிவிவரங்கள் அந்த அணிக்குச் சாதகமாக இல்லை. ஆனால் இந்த உலகக் கோப்பை கிரிக்கெட் போட்டியில் மேற்கிந்திய அணியின் கிறிஸ் கெய்ல் என்ற ஒருவர் நினைத்தால் எது வேண்டுமானாலும் நடக்கலாம். உலகக் கோப்பை போட்டிகளில் இதுவரை 15 ஆட்டங்களில் 434 ரன்களையே அவர் எடுத்துள்ளார். ஒரு சதம் 2 அரைசதம்தான் எடுத்துள்ளார். ஆனால் 223 ஒருநாள் போட்டிகளில் 19 சதம் 42 அரை சதங்களுடன் 7917 ரன்களை எடுத்துள்ளார். சராசரி 39. ஸ்ட்ரைக் ரேட் 83.74. இவரது கூடுதல் பலம் ஜெயசூரியா போல் ஆஃப் ஸ்பின் பந்து வீச்சை சிக்கனமாக வீசுவதோடு முக்கிய விக்கெட்டுகளையும் சில சமயங்களில் வீழ்த்தி விடுவார்.



இவரை விட அனுபவசாலியான சந்தர்பால் அணியில் உள்ளார். ஆனால் அவரது ஃபார்ம் அவ்வளவாக சரியில்லை. சர்வாணின் அனுபவமும் கைகொடுக்கும் ஆனால் இவரெல்லாம் மேட்ச் வின்னர்கள் இல்லை. நடுக்கள வரிசையில் டேரன் பிராவோ என்ற புதிய இடது கை அதிரடி வீரரின் வருகை பலம் சேர்க்கும் ஆனால் உலகக் கோப்பை அழுத்தம் இங்கிலாந்து, தென் ஆப்பிரிக்கா, இந்தியா அளிக்கும் நெருக்கடி என்று இவரைப்பற்றி எளிதில் ஊகிக்க முடியவில்லை. துவக்கத்தில் அட்ரியன் பரத் நம்பிக்கை அளிக்கிறார்.

புதிய அதிரடி மன்னன் கெய்ரன் போலார்ட் இருபது ஓவர் ஆட்டங்கள் அளவுக்கு ஒருநாள் கிரிக்கெட்டில் இதுவரை பெரிதாக அச்சுறுத்தவில்லை. ஆனால் இவர்களையெல்லாம் நம்ப முடியாது. திடீரென ஆட்டம் பிடித்து விட்டால் 10 ஓவர்கள் 100 ரன்கள் எல்லாம் சர்வ சாதாரணமாகிவிடும். டெவன் ஸ்மித் என்றஹிட்டரும், ஆல்ரவுண்டரும் உள்ளார்.



பந்து வீச்சில் கேமர் ரோச், மற்றும் இடது கை சுழற்பந்து வீச்சாளர் சுலைமான் பென் தவிர மற்ற வீச்சாளர்கள் அதிகம் அறிமுகமில்லாதவர்கள் இந்த இடமும் மிடில் ஆர்டரும் மேற்கிந்திய அணியின் பலவீனங்கள்.

வங்கதேசத்திடமும் தோல்வி தழுவும் வாய்ப்புகளுடன்தான் இந்த அணி களமிறங்குகிறது. எப்படியும் காலிறுதிக்குள் நுழைந்து விட்டாலும் அதில் முதல் போட்டியிலேயே கிறிஸ் கெய்லுக்கு ஆட்டம் பிடித்துக் கொண்டால் இந்த அணி அரையிறுதிக்கு முன்னேறிவிடும். எனவே எதுவும் கூறவியலாது. ஆனால் வங்கதேசம், அயர்லாந்து அணிகளும் இந்த அணிக்கு சவால் ஏற்படுத்தினால் ஆச்சரியப்படுவதற்கில்லை.

காலிறுதியில் ஏதாவது ஒரு பெரிய அணியை வெளியேற்றி அரையிறுதியில் மோசமாகத் தோல்வியைக்கூட இந்த அணி தழுவலாம். இதனால்தான் இந்த அணியை நாம் குறைத்தும் மதிப்பிட முடியாது, வெற்றி பெறும் என்று உறுதியாகவும் கூறிவிடமுடியாது.



இந்த அணியை பி-பிரிவில் ஒரு எக்ஸ்-ஃபேக்டர் என்று கருத இடமுண்டு. ஆனால் ஏகப்பட்ட எக்ஸ்-ஃபேக்டர்கள் உள்ளது, வங்கதேசமும், அயர்லாந்தும் எக்ஸ்-ஃபாக்டர்கள்தான். மேற்கிந்திய அணியை ஒப்புநோக்கும்போது வங்கதேச அணி சற்றே ஒருங்கிணைப்பு பெற்றுள்ள அணி என்று கூறலாம். எனவே இந்தியா, இங்கிலாந்து, தென் ஆப்பிரிக்க அணிகளுக்கு பிற 3 அணிகள் அச்சுறுத்தல் என்றால் மேற்கிந்திய அணிக்கு ஹாலந்து தவிர அனைத்து அணிகளும் அச்சுறுத்தல்தான்.இந்த நிலையில்தான் இந்த அணி களமிறங்குகிறது.

உலகக்கோப்பை 2011:பாகிஸ்தான் (World Cup 2011- Team PAKISTAN)

பாகிஸ்தான் 2011 உலகக் கோப்பை வாய்ப்புகள்:



இந்த முறை எந்த உலக கோப்பையைக் காட்டிலும் கணிக்க முடியாத அணி என்ற நிலவரத்தில் உச்சத்தை எட்டியுள்ளது பாகிஸ்தான்.ஏனெனில் நினைத்துப்பார்க்க முடியாத இடத்திலிருந்து வெற்றி பெறுவதும் அதேபோல் தோல்வியே இனி சாத்தியமில்லை என்ற நிலையிலிருந்து தோல்வி தழுவுவதும் பாகிஸ்தான் அணிக்கு சகஜமாகிவிட்டது என்பதாலேயே கணிப்பு கடினமாகி விடுகிறது.

ஹஃபீஸ் ஒன்றும் சொல்வதற்கில்லை. ஷேஜாத் ஒரு புதுமுகம், யூனிஸ் கான் மட்டுமே அனுபவ வீரர். உமர் அக்மல் ஒரு கறுப்புக் குதிரை அவர் மட்டும் மனது வைத்தால் தனி ஆளாகவே வெற்றி பெற வைக்க முடியும். ஆனால் சமீபமாக அவரது ஆட்டம் திறமைக்கேற்ப இல்லை.



அஃப்ரீடி ஆட்டம் சூடு பிடித்தால் எந்த ஒரு பந்துவீச்சும் அன்று சுண்ணாம்புதான். அதே போல் அப்துல் ரசாக். இவர் போட்டியை எந்த சரிவிலிருந்தும் வெற்றியாக மற்றக்கூடிய திறமை படைத்த அதிரடிப் புலி. இவர் தென் ஆப்பிரிக்காவுக்கு எதிராக சமீபமாக துபாயில் அடித்த அதிரடி 10 சிக்சர்கள் கொண்ட சதம் ஸ்மித்தின் துர்கனவாக இன்றும் இருக்கும் என்று நம்பலாம்.அனைத்தையும் மீறி இந்த வீரர்கள் ஒருநாளில் படு மோசமாக சோடை போகலாம், மறு நாளில் பயங்கரமாக எழுச்சியுறலாம். ஒருவரும் கணிக்க முடியாது.

எழுச்சியுறும் ஆட்டம் காலிறுதியாக இருந்தால் அன்று வெளியேறும் அணி துரதிர்ஷ்டம் வாய்க்கபெற்றது என்று கூறுவது தவிர வேறு வழியில்லை.

நியூஸீலாந்தை இந்த அணி வீழ்த்த வாய்ப்புகள் அதிகம் ஆனால் ஆஸ்ட்ரேலியா, இலங்கையுடன் போராட வேண்டி வரும். இவர்கள் பிரிவில் ஜிம்பாப்வே வேறு உள்ளது. எது வேண்டுமானாலும் நடக்கலாம்.



இவையெல்லாவற்றையும் மீறி, பி.சி.சி.ஐ. பாகிஸ்தான் கிரிக்கெட்டை மறைமுகமாக அழிக்கச் செய்து வரும் சூழ்ச்சிகளும், ஐ.சி.சி. அதற்கு துணை போவதும் நடைபெற்று வரும் சூழ்நிலையில் இந்த பாகிஸ்தான் அணி இறுதிப்போட்டிக்குள் நுழைந்தாலே அது இந்திய கிரிக்கெட் கட்டுப்பாட்டு வாரியத்தின் முகத்தில் கரியை பூசுவதாக அமையும்.

சூதாட்டம் மற்றும் சூழ்ச்சிகளுக்கு எதிராக பதிலடி கொடுக்குமா பாகிஸ்தான் என்பதை பொறுத்திருந்து பார்ப்போம். எந்த அணியை விடவும் இந்த உலகக் கோப்பை கிரிக்கெட்டில் சிறப்பாக விளையாட வேன்டிய கடும் தேவையும் நெருக்கடியும் உள்ள அணி பாகிஸ்தான் என்றால் அது மிகையாகாது.

உலகக்கோப்பை 2011: தென்ஆப்ரிக்கா (World Cup 2011- Team SOUTH AFRICA)

2011 உலகக் கோப்பையில் தென் ஆப்பிரிக்கா

உலகக் கோப்பை கிரிக்கெட் தொடர்களில் 40 போட்டிகளில் விளையாடியுள்ள தென் ஆப்பிரிக்கா 25 போட்டிகளில் வெற்றி பெற்று 13-இல் தோல்வி தழுவி இரண்டு போட்டிகளில் டை செய்துள்ளது. இந்த இரண்டு டைகள்தான் இரண்டு உலகக் கோப்பைகளில் அதன் வாய்ப்பை பறித்தது என்பது குறிப்பிடத்தக்கது.
இந்த உலகக் கோப்பை தொடரில் தென் ஆப்பிரிக்கா பலமான அணியுடன் களமிறங்குகிறது. கிரேம் ஸ்மித் 165 ஒரு நாள் போட்டிகளில் 39 என்ற சுமாரான சராசரியுடன் 6097 ரன்களை எடுத்துள்ளார். 8 சதங்கள் 43 அரை சதங்கள். ஸ்ட்ரைக் ரேட் 82. அதிகபட்ச ஸ்கோர் 141.

இவர் திறமைக்கேற்ப விளையாடுவதில்லை என்ற விமர்சனம் இவர் மீது உண்டு. ஆனாலும் அபாயமான வீரர். சிறந்த கேப்டன், ஃபீல்டிங் உத்தி, பந்து வீச்சு மாற்றம் ஆகியவற்றில் திறமை படைத்தவர். இந்த உலகக் கோப்பையில் இவர் தனது திறமையைக் கூட்டினால் தென் ஆப்பிரிக்கா பயனடையும்.

இவருடன் துவக்கத்தில் களமிறங்கும் ஹஷிம் அம்லாவுக்கு இது முதல் உலகக் கோப்பை. ஆனால் கவனிக்கப்படவேண்டிய வீரர்களில் இவர் ஒருவர் என்றால் அது மிகையாகாது. இவர் டெஸ்ட் மற்றும் ஒருநாள் கிரிக்கெட்டில் தனது அபாரத் திறமையுடன் தற்போது விளையாடி வருகிறார். இவரது ஃபார்ம், அல்லது ஃபார்ம் இன்மை தென் ஆப்பிரிக்காவின் வெற்றி தோல்வியைத் தீர்மானிக்கும் அளவுக்கு இவர் அந்த அணியில் முக்கிய வீரர் அந்தஸ்தை பெற்றுள்ளார்.

ஒருநாள் கிரிகிக்கெட்டில் மைக் ஹஸ்ஸியைக் காட்டிலும் அதிக சராசரியான 59.88 என்ற சராசரியுடன் இவர் களமிறங்குகிறார். அபாயகரமான வீரர். அதிகபட்சமாக 140 ரன்கள் எடுத்துள்ளார். ஸ்ட்ரைக் ரேட் 93% வைத்துள்ளார்.



ஆனால் தென் ஆப்பிரிக்காவின் வெற்றி தோல்விகளை தனி நபராகத் தீர்மானிக்கும் ஒரு வீரர் உண்டு என்றால் அது ஜாக் காலிஸைத் தவிர வேறு யாராகவும் இருக்க முடியாது.

இவர் விளையாடும் கடைசி உலகக் கோப்பை இது. இந்திய மண்ணில் 2 ஐ.பி.எல். கிரிக்கெட் போட்டிகளில் விளையாடி பயங்கரமான ரன் குவிப்பிலும் அதிரடி திறமைகளையும் காட்டியவர். இந்திய பிட்ச்களில் இவரது ஆட்டம் தென் ஆப்பிரிக்க அணிக்கு 200% பலம் சேர்க்கும் என்று எதிர்பார்க்கலாம். எதிரணியினர் இவரது ஆட்டத்தை விவாதிக்காமல் களமிறங்க முடியாது. 307 ஒரு நாள் போட்டிகளில் 45.84 என்ற சராசரியுடன் 11,002 ரன்களைக் குவித்துள்ள ஜாக் காலிஸ் 17 சதங்களையும், 80 அரைசதங்களையும் எடுத்துள்ளார்.

முக்கியமாக பந்து வீச்சில் இவர் 259 விக்கெட்டுகளைச் சாய்த்துள்ளார். ஓவர் ஒன்றுக்கு 4.8 ரன்களையே இவர் விட்டுக் கொடுத்துள்ளார். கேரி சோபர்சுக்குப் பிறகு ஒரு முழுமையான ஆல்ரவுண்டர் என்ற பெயர் எடுத்துள்ள இவருக்காகவாவது தென் ஆப்பிரிக்கா இந்த உலகக் கோப்பையை வெல்ல போராடும்.

இவர்கள் தவிர ஏ.பி.டீவிலியர்ஸ் ஒரு அபாய வீரர், பல்திறமைப் படைத்தவர். இந்தியாவில் ஐ.பி.எல். கிரிக்கெட்டில் அதிரடி இன்னிங்ஸ்களை விளையாடி அனுபவம் பெற்றவர்.அடுத்ததாக ஜான் பால் டுமினி. இவரும் சமீபமாக நமது ரெய்னா போல் பின்களத்தில் இறங்கி தனது புது வகை ஷாட்களினால் விரைவு ரன் குவிப்பு செய்பவர். ஆல்ரவுண்டர் இடத்தில் டூ பிளெஸிஸ் என்பவர் வந்துள்ளது இந்த அணிக்கு கூடுதல் பலம் ஏனெனில் இவர் அபாரமான ஒரு ஃபீல்டர்.

பந்து வீச்சில் இரண்டு மேட்ச் வின்னர்களைக் கொண்ட ஒரே அணி இதுவாகத்தான் இருக்கும், டேல் ஸ்டெய்ன், மோர்னி மோர்கெல் ஆகியோர் சமீபமாக வீசி வரும் முறை உலகின் எந்த ஒரு பிட்சாக இருந்தாலும் எந்த ஒரு பேட்டிங் வரிசையாக இருந்தாலும் திணறலுக்குள்ளாவதைத் தவிர வேறு வழியில்லை.

இவர்கள் தவிர சொட்சோபி உள்ளார். இதில் பலவீனமான இணைப்பு வெய்ன் பார்னெல்தான். ஜோஹன் போத்தா சிக்கனமாக வீசக்கூடியவர். இவரது நடு ஓவர்கள் மிகவும் முக்கியமானது.எனவே ஸ்மித், அம்லா, காலிஸ், டீவிலியர்ஸ், டுமினி, ஸ்டெய்ன், மோர்கெல், சொட்சோபி, போத்தா ஆகிய 9 மேட்ச் வின்னர்களைக் கொண்டுள்ளது இந்த அணி.ஆனால் இந்த அணியின் மிகப்பெரிய பலவீனமென்னவெனில் மிகவும் நெருக்கடியான தருணங்களில் வெற்றி வாய்ப்பை பொதுவாக எதிரணிக்கு விட்டுக் கொடுக்கும் போக்கு உள்ளதே.

சமீபத்தில் கூட ஒரு போட்டியில் ஷாஹித் அஃப்ரீடியும், அப்துல் ரசாக்கும் வெற்றி பெற முடியாத இடத்திலிருந்து தென் ஆப்பிரிக்காவுக்கு எதிராக வெற்றிக்கு இட்டுச் சென்றனர்.

அதேபோல் மிகவும் சமீபத்தில் யூசுப் பத்தான் அதிரடி சதம் எடுத்து வெற்றிக்கு அருகில் கொண்டு வந்தார். ஆனால் மற்ற நாட்களில் இதுபோன்ற நெருக்கடி போட்டிகளில் தென் ஆப்பிரிக்கா தோற்றுள்ளது.



இந்திய ஆட்டக்களங்களில் அதிரடித் துவக்கம் தேவை. இதனால் ஜாக் காலிஸையும், அம்லாவையும் துவக்கத்தில் களமிறக்கிப்பார்க்கலாம். அல்லது டுமினியைக் களமிறக்கி ஒரு சூழ்ச்சி செய்து பார்க்கலாம்.

சிறந்த பேட்டிங், பந்து வீச்சு வரிசை, ஆல்ரவுண்டர்கள் , ஃபீல்டிங் திற்மையுடன் தென் ஆப்ப்ரிக்க அணி களமிறங்குகிறது. இந்த அணிக்கு அபாயம் காலிறுதி ஆட்டம்தான், இலங்கையையோ, ஆஸ்ட்ரேலியாவையோ, பாகிஸ்தானையோ எதிர்கொள்ள நேரிட்டால் இந்த அணி சோடை போவதற்கான வாய்ப்புகள் உள்ளது.ஆனாலும் அணிச் சேர்க்கையை வைத்துப் பார்க்கும் போது அரையிறுதி வரை இந்த அணி முன்னேறும் என்று கூற வாய்ப்புண்டு.